【市場小姐有話兒 - 有人追】
市場小姐：喂，你有冇睇？
佛系男：睇你？
市場小姐：唔係呀，張志恒同佢老婆呀。
佛系男：有望過下啲頭條啦，不過八卦新聞有咩好睇？
市場小姐：你睇下啦，學下人地。
佛系男：學佢地嘈離婚？定係你想學生仔？
市場小姐：頂你呀！叫你學下張志恒老婆，人地幾多follower，而家仲搞埋課金Channel。你個《佛系股評》Page 就係太悶，學下人地啲有趣野，咁先多人追蹤麻！你個專欄又好，揀啲股票又好，啲主題都好悶，太踏實啦，又冷門，大眾鍾意花邊，鍾意股價郁兩格就搵啲野講，咁先會多人追蹤你架。
佛系男：踏實、冷門有踏實、冷門的好處。反映我真係表裡如一。佛系股評面世以來，每次買賣股票的節奏都好單調，啱價就買，買完就等，到價就賣，或者基本面轉變就認輸，很間中如果見到性價比更高的股票就內心掙扎幾秒就毅然轉會。投資係要忍得住悶，耐得住寂寞，抵得住無常，抗得了潮流。
反正咁多年來我跟從自己認為有效的方法，長期實踐比一般人更高、更有把握的複合年均回報。咁仲奢求啲乜？
市場小姐：咁你唔想多啲人追蹤你咩？學下其他人的傳銷策略有乜壞。
佛系男：想。但同買完股票等股價升一樣。做好分析、衡量好風險、按步大膽下注，係「盡人事」，股價升跌係「聽天命」。如果為吸引聽眾而改變投資風格，做自己不能把握的事，咁係本末倒置。
好似隻廣深鐵路咁，我兩年前平均成本1.4元重注買入，同時被喝倒彩足足兩年。有人話我分析錯誤，廣深鐵毛利率低，復常都唔會好得去邊；又有人話，要等佢股價升，時間成本高，重注一擲係愚蠢行為；友人更講反話：「全香港得你一個識得睇廣深鐵」。
到近月，廣深鐵股價升到2.5元，我因為見到有性價比更高的選擇，所以已經減持得七七八八。係我減持緊時，而家每星期有專家推薦廣深鐵，話呢隻股票進入上升周期、業績改善。
市場小姐：咁股價係米會繼續升？
佛系男：唔出奇。大灣區融合後，高鐵、和諧號的載客量肯定會超越疫情前水平。收入增長會繼續支持股價向上，當見到開始炒作大灣區融合的新聞，相信就是股價見頂訊號，但暫時都仲未出現。
市場小姐：人地而家追入，你會唔會太早賣呀？
佛系男：我偏好揀啲無人追既野，例如…
市場小姐：#%!&$
Comentarios